Nagpabutyag na ang duha ka tag-iya sang tatlo ka mga balay sa Purok Katilingban Barangay 39 sa Bacolod City nga iga-demolish nga boluntaryo nalang sila nga magabiya sa amo nga duta matapos nga liwat sila nga nakigsapol sa City Legal Office kag sa Barangay sang Huwebes nga adlaw.
Nangin tensyonado ang una nga ipatuman kuntani nga demolition sa amo nga lugar matapos nga ginpamalabagan sang mga residente ang demolition team nga magsulod sa amo nga property.
Una na nga ginsiling sang pamunuan sang Barangay 39 nga ang amo nga duta ang gin-donate sang Pamilya Lizares sa Provincial Government sang Negros Occidental.
Gamiton sang Philippine Charity Sweepstakes Office ang amo nga duta agud patukuran sang ila opisina.
Ginsiling ni Atty. Bartolome Malde Jr., pamuno sang CLO Enforcement Team nga kabaylo sa pagkakas sang duha ka tag-iya sang ila mga balay sa amo nga duta, magahatag ang PCSO sang 60 day minimum wage ukon masobra sa 32,000 pesos sa ila.
Magluwas sini, magahatag man ang Department of Social Services and Development sang dugang nga assistance sa idalum sang Assistance to Individuals in Crisis Situations nga programa.
Padayon man nga gina reach out sang siudad ang isa pagid ka tag-iya sang isa ka balay nga nabilin. Ini amo si Enrico Nicor, ang nagpakilala nga pamuno sang isa ka tribal nga grupo nga naga-angkon sang amo nga duta.
[sibwp_form id=1]