Gin baha liwat ang Barangay Mailum, Bago City matapos ang mabaskog nga ulan sang weekend.
Ginbaha ang porsyon sang Purok Katubuhan I Barangay Mailum sa siudad sang Bago matapos ang mabunok nga pag-ulan nga nagdugay sang kapin duha ka oras sang Sabado sang hapon.
Halos indi na maagyan ang dalanon sa Purok Katubuhan I bangud sa kadalom sang tubig baha. Ini ang nakaapekto sa pila ka mga residente kag mga turista nga kuntani maga lagaw pa pakadto sa mga resorts kag kapehan sa barangay.
Isa man ka motorista ang na-stranded matapos nga mabasa kag malab-ot sang tubig baha ang makina sang iya motorsiklo kag wala na nag andar.
Suno kay Punong Barangay Melchor Sayco sang Mailum nga ila ini ipalab-ot sa siudad agud nga mahatagan sang eksakto nga solusyon. Suno kay Sayco, ang lugar nga ginbaha yara sa isa ka pribado nga lote.
Sa Facebook post naman ni Konsehal Vicoy Javellana, ginpahayag sini nga magahimo sila ang imbestigasyon kun ano gid ang nangin ugat sang pagbaha. Sang nagligad nga bulan ginbaha man ang porsyon sang barangay nga yara na sa nataasan nga bahin sang Bago.
Suno sa mga residente wala man ginabaha sadto ang Mailum kag sang sini lang gid ini nga natabo.