Ginpahayag sang Station Commander sang Police Station 2 nga si Captain Leo Estopa nga tubtob karon, wala pa sila sang may naka padulong sa ila talatapan agud mag file sang blotter report angut sa gina alegar abduction nga natabo kagab-i sa 19th Lacson Street sa Bacolod.
Suno kay Estopa, bisan pa wala sang pormal nga reklamo, ila man kagab-i nga ginkadtuan ang lugar kun sa diin natabo ang ginag alegar abduction kag gin usisa ang saksi.
Ang gwardiya suno sa pulis nag siling nga iya nakita nga ginpanaugan ang isa ka babayi pero sila ang naka istoryahanay pa antes siya ginpwersa pasakay sa isa ka SUV sa bulig sang isa pa ka persona.
Pero si Estopa nagsiling nga ini tanan ang alegasyon lang kay man wala man sila makabaton pormal nga reklamo kag wala man sang may naka report sa mga police station angut sa persona nga na missing.
Posible man suno kay Estopa nga mag kahagugma ukon mag asawa lang man ang gina tumod sang nakakita.
Nakuha man sang mga nakasaksi ang plate number sang salakyan kag i verify ini sang kapulisan kun matuod gid man ang alegasyon sang mga nakakita suno kay Estopa.