Negros Occidental Police Provincial Office ang nagpahayag nga indi matuod ang balita nga may yara sang presensya sang mga katapo sang Moro National Liberation Front sa banwa sang Don Salvador Benedicto.
Suno sa public information officer sang NOCPPO nga si Police Lieutenant Abegael Donasco, ila ginkumpirmar sa hepe sang DSB Police Station kun ano ka matuod ang alegasyon nga may nasiplatan nga mga katapo sang MNLF sa banwa sang nagligad nga Nobyembre.
Ginpahayag ni Donasco nga wala ini sang kompirmasyon gikan sa ila nga Intelligence Branch kag mahimo sala lang nga impormasyon ang nakalab-ot sa mga pumuluyo sang banwa.
Nagapasalig ang PNP nga hugot ang ila pagbantay sa bug-os nga probinsya para masiguro nga indi masudlan sang mga armado nga grupo gikan sa iban nga lugar kag mapabilin ang kalinong.