May yara karon sang 66 ka mga designated firecrackers kag community fireworks display zones sa 44 ka mga barangay sa Bacolod City.
Sandig sa Republic Act 7183 sa ini lamang nga mga lugar sarang makapalupom kag makagamit sang mga pyrotechniques.
Suno kay Bacolod City Police Office Spokesperson Police Lieutenant Colonel Ariel Pico, kun estriktuhon gid ang kasuguan bisan simple nga pasirit ukon fountain indi gid pwde sa gwa sang balay.
Kun ang barangay wala sang kaugalingon nga designated zones, mahimo sila nga makapadulong sa pinakamalapit nga barangay nga may yara sini.
“That is why may gin designate gid nga community fireworks display zone kay maskin pasirit na maskin fountain lang ina or mga pa ilaw indi na tuod makatuga sang dako nga lupok pero ang tendency bala nga makasunog ara naman da”, suno kay Pico.
Naka full alert ang PNP subong para mapasiguro nga mangin malinong kag matawhay ang palibot sa pagsug-alaw sang bag-ong tuig.
Kun may makita sila nga nagapalupok ukon nagapasirit sa gwa sang ila balay ila ini nga sawayon pero kun indi gid magpamati sarang na nila ini nga dakpon.
Namutikan sang PNP nga kalabanan sa nagapalupok ang mga kabataan.
“Kay nakita ko bisan sang nagligad nga December 24 ang nagapalupok kabataan gid ya ginapabay-an so ang sa amon lang dira kun indi gid mamati sawayon amo na siguro that’s the time nga manakop gid kita.”
Nagapahanumdum man ang PNP sa mga magapadulong sa designated firecrackers kag community fireworks display zones nga magsuksuk sang face mask, face shield kag magsunod sa physical distancing.