Nakuhaan sang CCTV footage ang kawatan nga nag sulod sa San Antonio Abad Parish sa Bacolod.
Ang video ang gin post sang simbahan sa ila nga facebook page para ipaandaman ang mga sumilimba.
Makita sa video nga ang lalaki nga sakay sa motorsiklo ang nag park sa kilid sang salakyan sa sulod sang compound sang simbahan kag nag panaog.
Sa sunod nga kuha sang CCTV, nakita nga may gin kuha ang lalaki sa atubang sang isa ka naka park nga bisekleta.
Ang ginkuha sang lalaki ang kahita gali sang isa ka personnel sang parokya.
Sa post sang simbahan ila ginpahayag nga ang lalaki ang nagkadto sa simbahan sang Disyembre 23 kag namangkot kun may kasal ukon bunyag.
Pero iya lang nga tuyo gali amo ang pagpangawat.
Suno sa tagdumalahan sang simbahan, wala na sila naka pangayo pa sang bulig sa otoridad pero ila ini gin post sa social media agud maghatag sang paandam ilabi na sa mga sumilimba nga indi mag bilin sang mga pagkabutang nga wala sang bantay bangud mismo sa simbahan may ara sang nagapangawat.