Nagpagwa sang opisyal nga pahayag ang Philippine College of Physicians – Negros Occidental Chapter may angut sa kaso sang isa ka nagabusong nga iloy sa Bacolod City nga nagpositibo kag nagnegatibo sa COVID-19 base sa resulta nga ginpagwa sang duha ka separado nga biomolecular laboratory.
Sang nagligad nga Nobyembre 23, ginpaidalum sa swab test ang iloy sa iya pagpa prenatal check-up sa Bacolod City Lying-in Clinic kag sang Nobyembre 26 ginpahibalo siya sang barangay nga nagpositibo siya sa COVID-19.
Matapos mahibaluan nga nagpositibo siya sa virus, gilayon ang iloy nga nagpa swab test liwat sa Philippine Red Cross Biomolecular Laboratory kag nakakuha naman sang negatibo nga result pero ginpaidalum siya sa gihapon sa home quarantine pati ang iya bilog nga pamilya.
Suno sa presidente sang PCP – Negros Occidental Chapter nga si Dr. Michael Thomas Salvador, namutikan sang ila nga grupo nga may yara sang mga pasyente nga gilayon nga nagapakuha sang ikaduha nga swab test matapos mahibaluan nga magpositibo sila sa una nga swab test.
Ginpahayag sang grupo pati na sang mga infectious disease specialists nga ang pagkuha sang repeat negative RT-PCR COVID test result sa sulod sang napulo ka adlaw matapos ini nakakuha sang positive result ang indi maka override sang una nga result.
Ini bangud kun makakuha ang isa ka pasyente sang false negative repeat test kag indi ma-isolate madamo nga mga persona ang mahimo niya malatnan sang virus.
Gindugang pa ni Dr. Salvador nga mahimo lamang makapa repeat testing ang isa ka positive patient kun may ara ini sang rekomendasyon sang iya doktor.