Shadow

Nagabusong nga iloy sa Bacolod naga kwestyun kun ngaa gin home quarantine bisan pa nag negatibo ang swab test result

Nobyembre 23 sang nagpa prenatal check up sa City Health Office ang nagabusong nga iloy nga taga Barangay Pahanocoy, Bacolod City.

Suno sa iya bana nga nakigsugilanon sa Digicast Negros, ginpaidalum siya sa swab test bilang standard operating procedure sa mga nagapakonsulta nga nagabusong.

Ginpahibalo siya sang Huwebes sang barangay nga nagpositibo siya sa COVID-19 pero wala sang may ginpakita sa iya nga papel nga resulta.

Naghingagaw siya pa swab test liwat sa Philippine Red Cross kag nag negatibo ang resulta sang iya swab test.

Apesar sang negatibo nga resulta ginpaidalum siya sa gihapon sang barangay sa quarantine.

Pero imbes nga sa isolation facility sang siudad ibutang ginpahanugutan siya nga mag home quarantine kaupod sang iya bana bangud nagabusong kag malapit na lamang nga magbun-ag.

Indi karon makatrabaho ang iya bana bangud napaidalum sila sa home quarantine.

Gintinguhaan sang Digicast Negros nga makuha ang pahayag sang Bacolod Emergency Operations Center kun ngaa ginpaidalum sa gihapon ang iloy kag ang iya pamilya sa quarantine apesar sang negatibo nga swab test pero bwas pa natalana nga magpagwa sang opisyal nga pahayag ang EOC bangud ila pa gina usisa ang natabo.

Secured By miniOrangeSecured By miniOrange