Separado nga ginpaidalom sa lockdown sang barangay ang balay sang walo ka tuig nga bata nga lalaki kag 63 anyos nga iloy nga lunsay positibo sa Covid-19 Delta variant sa Barangay Mansilingan sa Bacolod.
Suno kay Punong Barangay Rodolfo Pico, ginahulat pa nila nga mag-gwa ang resulta sang swab test sang bata kag sang iya mga ginikanan pati na ang sa 63 anyos nga iloy kag sang iya duha ka mga kabataan.
Hulyo kinse sang nagpositibo sa virus ang walo ka tuig nga bata. Hulyo 23 naman sang magpositibo ang RT-PCR test sang 63 anyos nga iloy.
Suno kay Dr. Chris Sorongon, deputy for medical data and analysis sang Bacolod Emergency Operation Center, ang swab specimen sang duha ka Covid-19 dDlta variant sa Mansilingan, kag duha pa sa Barangay Sum-ag kag Banago ang kabahin sang mga swab samples nga napadala sa Philippine Genome Center sang Hulyo.
Napaidalom na sa surgical lockdown ang puluy-an sang 71 anyos nga lalaki sa Barangay Banago kag ang puluy-an sang 32 anyos nga iloy nga nagabusong.
Suno kay Punong Barangay Rodney Carmona sang Barangay Sum-ag, ila man gin lockdown ang puluy-an sang tupad balay sang 32 anyos sang nagpositibo ang iya Rt-PCR test result.
Naka recover na ang iloy kag nag-negatibo na ang resulta sang iya RT-PCR test pero iya ang gin updan sa isolation facility ang iya duha ka mga menor de edad nga kabataan nga nagpositibo man sa Covid-19.
As of August 12, ,nag gwa man sa record sang Department of Health 6 nga sa 169 swab samples nga napadala sa Genome Center, apat diri ang positibo sa Delta variant kag ang walo na detect nga variants of interest kasubong sang Alpha kag Theta.
Suno pa sa pamunuan sang EOC, may delay sa pagpa gwa sang resulta sang Genome Center bangud ang tanan nga nga rehiyon sa Pilipinas didto nagapadala man sang swab samples.
Amo nga upod sa mga local government unit kag provincial officials, ila man ginaduso ang pagpatukod sang Genome Center sa Western Visayas.
Ini agud mas mapadasig ang paghimu sang tikang kontra sa paglapta sang Covid-19.
Sa bilog nga Pilipinas ang Caraga Administrative Region na lang ang rehiyon nga wala sang Delta variant.