Yara na karon sa custody sang Cadiz PNP ang ginakabig “person of interest” sa pagpatay sa 38-anyos nga iloy nga ang bangkay nasapwan sa bakante nga lote sa Sitio Capayas, Barangay Sicaba sa Cadiz City sadtong Mayo 21.
Ginsiling ni Police Lt. Daleen Grace Loreno, deputy chief sang Cadiz PNP, nadakpan sa buy-bust ang 21-anyos nga lalaki kag narekober sa iya ang isa ka .38 caliber nga pusil kag 11 ka gramos sang suspected shabu.
Ang POI amo ang ginatudlo nga may kahimuan sa pagpatay sa biktima nga si alyas “Jen”.
Udto sang Huwebes, magakuha kuntani sang kwarta sa lending firm ang biktima upod ang iya bana, apang nagpa-gas ang iya bana kag naghulat ang biktima sa waiting shed. Pagbalik sang iya bana, wala na ang iya asawa.
Naghaum ang bana nga nag-una ang iya asawa sa Lending Company apang wala man siya didto.
Sa wala untat nga pagpangita sang bana kag iya bata sa biktima, ila siya nakit-an sa bakante nga lote, mga 15 tubtob 20 metros ang kalayuon sa waiting shed.
Wala sang undergarment ang biktima, ginkuga gamit ang strap sang iya bag kag may mga lagub ini sa mata, tuga sang paglampos sang bukol sang lubi.
Sa karon, padayon ang pagpangita sang kapulisan sa magatindog nga saksi agud mapabakod ang kaso.
May pila naman ka mga indibidwal nga taga Sicaba ang nag-amot-amot kag nakatipon sang P30,000 nga reward money agud ihatag sa mga saksi nga may impormasyon kag makabulig agud mahataganan sang hustisya ang kamatayon sang biktima.
“Naga-appeal kita sa mga witnesses nga nakabalo sang insidente nga natabo sa may Sicaba kag sa pagpatay kay Jen nga indi kamo mahadlok, indi kamo magkatahap kay ang inyo PNP, ang inyo local government unit, even si mayor, naga-full support, nagahatag sang suporta sa mga willing nga maghatag sang ila mga statement, nga mag-point out sa aton ‘person of interest’ kag buligan ninyo kami nga masolbar na ini nga krimen”, suno kay Loreno.*
[sibwp_form id=1]