Masobra sa 500 ka ektariya sang humayan sa sur nga bahin sang Negros Occidental ang naigo sang tuman nga kainiton ukon moisture stress.
Sa damage report sang Office of the Provincial Agriculturist nga gin-submit kay Negros Occidental Governor Eugenio Jose Lacson sadtong Mayo 22, nagdangat sa P16.2 million ang balor sang kahalitan tuga sang moisture stress sa pananum.
P15.8 million diri ang sa humayan sa Silay City, San Enrique, Bago City, Pulupandan, kag Hinoba-an.
Masobra naman sa P323,000 ang kahalitan sa high value crops sa Pulupandan.
Suno sa Provincial Disaster Risk Reduction Management Office, pila man ka semana nga may mga lugar pwerte ang init rason nga nag apekto sa pananum. Pero, ginsiling ni PDRRMO head, Irene Bel Ploteña nga may mga lugar sa probinsya nga padayon ang pag tupa sang ulan.
May El Niño alert na damlag pa gin pa gwa ang PAGASA. Ang El Niño, may 79 percent nga tsansa sa June-July-August kag mahimo nga maga pabilin tubtob sa una nga bahin sang 2027.
Sini nga Mayo kalabanan nga bahin sang Visayas kag Western Mindanao ang laban nga maga eksperiensya sang above normal rainfall base sa damlag pa nga forecast.
“Makita mo sa aton advisory, may ara kita sang mga isolated rainshowers, may ara ta sa south, may ara man sa north, these past few days actually. May ara man siguro influence right now is ang aton low pressure area bala, ang trough niya naga apekto kag naga dula sang ulan sa aton diri sa province”, suno kay Ploteña.*
[sibwp_form id=1]