Ginpasakaan sang Bacolod City Government ang penalidad sa paghatag sang limos halin ₱50 pakadto ₱500 kasunod sang pag-amyenda sang Anti-Mendicancy Ordinance sang siudad.
Tinutuyo sini nga mapunggan ang pagdamo sang mendicants ukon ang mga naga pakalimos kag ang pag-usar sang kabataan sa pagpangayo sang limos.
Gin-author ini ni Councilor Israel Salanga kag gin-co-author ni Councilor Celia Flor ang ordinansa.
Suno kay Richelle Verdeprado-Mangga ang pamuno sang DSSD-Bacolod, ang mga naga-engganyo ukon naga-suporta sang mendicancy, kaangay sang naga-hatag sang limos, mahatagan sang warning kag penalidad: ₱500 sa first offense, ₱1,000 sa second offense kag isa ka adlaw nga pagkapreso.
May mabug-at nga penalidad naman nga ₱5,000 ukon isa ka tuig nga pagkapreso, para sa mga naga pakilimos nga naga pang-harass ukon naga pangdupla.
Ginbag-o man ang ngalan sang Anti-Mendicancy Task Force pakadto sa Bacolod City Mendicancy Management Division (BCMMD)kag gina plano ang mental health response task force para sa mga may problema sa paminsaron.*