Isa ka 38 anyos nga babaye nga gina alegar peke nga dentista ang gindakup Domingo sang hapon sa Alegria, Murcia paagi sa entrapment operation nga gin patigayon sang National Bureau of Investigation.
Suno kay Dr Analie Gonzaga ang presidente sang Philippine Dental Association – Negros Occidental Chapter, may mga tatlo tubtob apat ka tuig nga naga operate mismo sa iya nga balay ang natungdan nga persona.
Pila sa iya nga mga kliyente nga manunudlo.
Sadto anay naga trabaho ini bilang dental assistant sa duha ka mga dentista rason suno kay Gonzaga nga iya gin gamit sang iya nga eksperiensya.
Naga pangtakod ini sang dental braces, naga pang pasta kag naga pang gabot sang ngipon kag nagabuhat man sang dentures ukon pustiso.
Naga gamit sang alias ang 38 anyos nga babaye.
Una niya sadto nga mga pasyente ang iya nga mga paryente suno kay Gonzaga.
Kaso nga pagsupak sa Dental Law ukon RA 9484 ang atubangon nga kaso sang 38 anyos nga gina paabot iga file sini nga hapon via inquest proceedings.
Abiso naman ni Gonzaga sa mga pasyente nga siguraduhon nga lisensyado ang gina pakonsultahan nga dentista.
“Kalabanan gid ya subong nga flooded ang online nga mga DIY, sa ortho nga gina tawag treatment is very risky. Maski kami nga mga practicioner naga eskwela gid kami para correct way gid magbutang sang bracket. Sila ya gapanagpik lang na ya. Magkadto sa amon naga gum bleeding, may mga temporomandibular dysfunction, mag kalahunga ang ila mga ngipon. So dapat makadto gid sila ya sa lisensyado nga mga dentista”, suno kay Gonzaga.