Person deprived of liberty ukon PDL sa Handumanan District Jail ang nasamaran sang nag-maoy kag nang-guba sang pagkabutang sa sulod sang pasilidad.
Indi pa mapat-ud sang pamunuan sang Bureau of Jail Management and Penology 6 kun ngaa ang PDL nga si Jimmy Sablon ang nang-guba sang mga pagkabutang sa sulod sang BJMP isolation facility sa Barangay Handumanan.
Suno kay Atty. Jairus Dogelio, spokesperson sang BJMP 6, napadapatan na sang first aid si Sablon pero ginkinahanglan nga mapaidalom man siya sa psychological examination matapos nga mag-maoy sa sulod sang selda.
Sandig sa record sang BJMP, si Sablon nga may kaso nga murder ang makatatlo na ka beses nga nalagyo sa sulod sang bilangguan.
Nagligad lang nga tuig sang siya ang liwat nga nadakpan antes ginsaylo sa isolation facility halin sa Negros Occidental District Jail.