Presidente Ferdinand Marcos, Jr., ang gina paabot maga bisita sa evacuation center sa La Carlota buas nga adlaw, Biyernes.
Suno kay Mayor Rex Jalandoon, maga panagtag sang ayuda ang presidente sa mga apektado sang bulkan Kanlaon.
La una sang hapon gina paabot ang presidente para sa situational briefing kag pagkatapos sini ang pag panagtag sang bulig sa mga head of families sang mga evacuees.
May mga 1,200 ka persona ang evacuees sang La Carlota ukon mga 300 ka pamilya. Samtang, maga panagtag man sang bulig sa idalom sang AICS ukon Assistance to Individuals in Crisis Situtation ang utod sang presidente nga si Senator Imee Marcos sa La Carlota sa amo man nga hapon.
Wala labot sa La Carlota City gina paabot man ang presidente sa Victorias City para sa Alyansa sa Bagong Pilipinas Rally upod ang mga senatoriables.
Ang siudad sang Victorias ang nag pa gwa sang abiso nga paabuton ang heavy traffic sa palibot sang Victorias City Coliseum humalin las 9 sang aga tubtob las 9 sang gab-i.
Gina abisuhan ang publiko nga planuhon na ang tagsa ka mga ruta kag schedule angut sini.
Samtang sa venue mismo naga pahanumdom ang Victorias nga gina dumilian ang mga armas kag matalom nga bagay.
Mga flammable kag delikado nga items gina dumilian man.
Indi man pag tugutan ang mga tumbler, mug, laser pointers, plastic bags, balloons kag payong.