May natabo gid man nga pag taasay sang tingug, bayluhanay sugilanon kag pag palpag sa lamesa sa tunga ni Bacolod Congressman Albee Benitez kag Councilor Homer Bais sang panyapon sang Biyernes sa Bacolod Government Center.
Sa interview sang Digicast Negros kay Bais iya ginsiling nga ginkadtuan siya ni Benitez sa lamesa kag derecho nga nagtupad sa iya. Ginhambalan siya ni Benitez nga siya na lang mismo ang pamangkuton angut sa loan.
Suno kay Bais nag paathag siya sa kongresista nga sang July pa lamang may napasar na nga resolution ang SP nga naga pangayo sa mga komitiba sang comprehensive nga datus angut sa 6.1 billion pesos nga loan sang siudad, kun sa diin 4 billion diri ang sa idalom sang Benitez administration kag ang 2 billion sa Leonardia administration.
Wala labot nga naga pamangkot ang publiko, suno kay Bais, para man sa policy direction ang amo nga resolution labi na nga sa 2027 maga sugod na ang pag bayad sang siudad sang 450 to 500 million pesos para sa gin-loan kag ini ang malakip man sa 2027 budget deliberation.
Gin ako ni Bais nga wala niya gin paabot ang amo insidente, gani sang nagtaas suno sa iya ang tingug ni Benitez kag nag palpag sang lamesa, nag taas man ang iya nga tingug kag nag palpag man siya sang lamesa. Naka buya gid man siya sang sugilanon sa kongresista nga: Te ano kun Benitez ka? Pareho sila nga ginpakalma sang mga yadto didto nga mga kaupod man nila na opisyales.
Pero klaro niya wala sang may natabo nga daw ma tapungulay sila. Mag kaalyado si Benitez kag Bais. Sa tunga sang natabo suno kay Bais naga pabilin siya sa iya nga panindugan sang iya ginduso – ang comprehensive report angut sa estado sang mga loan, mag stick na lamang kuntani sa issue.
Sa isa ka press statement ginsiling ni Congressman Albee nga suportado niya ang transparency kag accountability. Iya gin tawag ang atensyon ni Bais bangud sang iya nga padayon nga public criticism nga para kay Benitez naga tuga sang unfair impression nga ang City Council kag ang mga kaupod niya mismo sa konseho ang daw may kasubong nga gina tago gikan sa publiko.
Maka pila man ka beses nga nag pakig-angut si Benitez kay Bais para matalakay ini. Ang iya gina kabalak-an suno kay Benitez amo nga ini ang mangin political grandstanding nga maga tuga sang panan-awan nga isa lang ka persona ang naga pakig-away para sa accountability samtang ang iya mga kaupod ang hungod nga wala naga hatag sang impormasyon.
Ini nga bagay ang unfair suno kay Benitez kag naga hatag sang pag duda sa integridad sang mga kasubong nga public official.
“Medyo taas na ang tono niya. Nag appeal pa gani ko sa iya. Indi na gani Cong address ko sa iya. Boss na gani. Boss pamatii man ko bala indi lang na ang mga gasulod sa imo nga version or istorya bal-an mo ang iban da boss mga sipsip naman na mo. Didto siya nag lupok. Gin bang niya ang table in front sa mga officials. Damo man ang tawo nakakita. Ang attention ara na sa amon. Off guard naman ko, gin bang ko man ang table. Indi ko i-deny nga naka hambal ko sa iya te ano kun si Albee Benitez ka. Ang actual ko na hambal indi mo ko ya tawo-tawo. Indi mo ko ya tuta. Galing na intervene na ang mga upod namon. Nag pakalma.
Ako nag exit na lang ko dayon. Automatic nag gwa ko. Wala na ko ka attend gani sang opening para wala na lang sang further nga problema”, suno kay Bais.
[sibwp_form id=1]