Mga tiglawas gikan sa Department of Health, Provincial Health Office lakip na City Health Office ang naga patigayon sang pangusisa sa karon angut sa isa ka kaso sang suspected schistosomiasis sa San Carlos City.
Ang Schistosomiasis isa ka infection nga gina tuga sang blood fluke ukon sang Schistosoma japonicum.
Sa post sang San Carlos City LGU Information Page, nagpadulong sa San Carlos City ang Regional Schistosomiasis Program Coordinator nga si Maria Lourdes Monegro upod ang iya nga team kasubong man ang team gikan sa probinsya kag siudad sang San Carlos. Sila ang nag patigayon sang Malacological investigation sa Sitio Medina, Brgy Rizal sadtong Pebrero 21 tubtob 22.
Ang amo nga pagpangusisa suno kay Monegro ang maga pat-od kun bala may yara sang Oncomelania hupensis quadrasi sa lugar kasunod sang pag ka confine sa local nga hospital kag pag ka patay sang isa ka suspected schistosomiasis-infected patient. Ang oncomelania hupensis quadrasi ang naga tumod sa snail host sang schistosoma japonicum.
Ang parasite ang naga sulod sa lawas sang tawo paagi sa skin penetration. Pila sa mga sintoma amo ang pag daku sang tiyan kag paghilanat pero sarang ini nga maayo kun mahatagan sang nagakaigo nga pagtatap kag pabulong.
Dugang pa ni Monegro, ila man usisaon kun bala konektado ang suba sang San Carlos kag Calatrava. May tatlo ka mga barangay sa Calatrava ang apektado sang amo nga parasite.
Ang Negros Occidental ang naga isahanon nga probinsya sa Western Visayas nga endemic sa Oncomelania hupneis quadrasi nga makit-an sa mga suba kag sa mga humayan. Suno kay Dr Girlie Pinongan ang Provincial health officer ila pa gina hulat sa karon ang report sang DOH.