Gina asikaso na sa karon sang pamilya sang napatay nga National Democratic Front consultant nga si Ericson Acosta, ang iya sini bangkay ila luyag i retrieve matapos nga mapatay sang Miyerkules sa Barangay Camansi sa Kabankalan.
Si Pablo Tariman nga amay sang iya misis nga si Kerima , nga napatay man sa enkwentro sang nagligad nga tuig, amo karon ang naga asikaso sa bangay sang iya umagad upod ang iya apo nga anak nanday Acosta kag Tariman.
Wala pa sila maka desisyon kun bala ipa cremate ang bangkay antes dal-on balik sa Metro Manila.
Samtang, mabasko naman gina kundenar sang 303rd Brigade sang Philippine Army ang ila ginasiling mga indi amo nga akusasyon sang NDF – Negros.
Liwat nga ginpanindugan ni 303rd brigade commander, Brigadier General Inocencio Pasaporte nga lehitimo ang natabo nga enkwentro kun sa diin napatay si Acosta kag upod sini nga si Joseph Jimenez.
Ini taliw-as sa ginsiling sang progresibo nga grupo nga ginkuha nga buhi ang duha kag gin patay sang army. Ginapanginwala man ni Pasaporte ang gina siling karon sang grupo nga gin abduct sang army si Ronald Francisco kag iya sini pamilya.
Sa balay ni Francisco naga tiner kag ginkuha sanday Acosta kag Jimenez suno sa grupo. Tubtob karon wala pa makita suno sa grupo ang pamilya Franicsco kag ila gina panawagan ang release sa pamilya.
Suno sa army, ini ang desperado nga tikang lang sang grupo agud higkuan ang reputasyon sang militar.