Pag-reassign sa pamuno sang General Services Office management prerogative sang alkalde.
Nag-report na kaina sa Bacolod City Government Center ang anay pamuno sang General Services Office nga si Gilda Lluisma para ma-turn over ang mga dokumento para sa natalana nga bidding sang mga inug-dispose nga government assets sang Bacolod.
Si Lluisma ang gin-reassign bilang pamuno sang City Population Office makaligad nga may 90 ka mga salakyan ang tubtob karon wala pa makit-an.
Nagpamalibad siya nga mag-hatag sang pahayag angut sa iya re-assignment.
Pero suno kay City Administrator Pacifico Maghari, III kabahin sang management prerogative sang alkalde ang pag-ilis sang mga nagapamuno sa mga city departments.
Ginalauman karon sang alkalde nga mapadayon ang imbestigasyon sa mga indi pa makit-an nga mga salakyan kag motorsiklo nga kadam-an na assign sa Bacolod City Police Office kag pila pa ka mga empleyado sang siudad.
Ang supply officer IV sang GSO nga si Victor Espina amo ang magapadayon sang inventory sa mga indi pa makit-an nga salakyan sang siudad.