Nagpangabay ang Sangguniang Panlungsod sa Bacolod nga pasakaan ang transportation allowance sang mga association presidents sang Persons with Disability kag Senior Citizens halin sa 500 pesos pakadto sa 1,000 pesos kada bulan.
Ang request ginhimo paagi sa Department of Social Services and Development, Office of the Senior Citizens Affairs kag Persons with Disability Affairs Office (PDAO) kay Mayor Greg Gasataya.
Ini nga Proposal nakasulod sa resolusyon nga gin-author ni Councilor Atty. Caesar Distrito, chairperson sang Committee on PWD Affairs, kaupod si Councilor Celia Flor, chairperson sang Committee on Senior Citizens.
Suno kay Distrito, nagtambong ang mga association presidents kag nagapabalo sang mga programa sang syudad sa ila mga miyembro.
Gindugang niya nga dugay na nga 500 pesos ang bulanan nga allowance sang mga presidente, kag nagakaangay lamang nga pasakaan ini sa 1,000 pesos bangud sa pagtaas sang presyo sang balaklon, gasolina, kag iban pa nga gasto.
Ginpaathag ni Distrito nga lokal nga pondo halin sa OSCA para sa senior citizens kag sa PDAO para sa PWD ang gamiton sa sini nga allowance. Sa record niya, may 74 ka association presidents sang senior citizens kag may 42 ka association presidents sang mga PWD sa syudad.*