May higher re-infection risk ang Omicron variant nga na-detect sang World Health Organization sa South Africa.
Gani sa pagsinapol ni Mayor Evelio Leonardia upod sa katapo sang Emergency Operations Center, liwat nga nadesisyunan ang pagpatuman sang strikto nga border control agud man mapunggan ang pagsulod sang panibag-o nga variant of concern nga amo karon ang ginapatihan rason sang pagsaka sang Covid-19 infection sa europe kag iban pa nga pungsod.
Kadungan ini sang travel ban nga ginmandu sang Inter Agency Task Force sa mga lugar may mga kaso na sang Omicron variant.
Kabahin man sang mga tikang sang siudad upod sa national government ang pagpatuman sang vaccination program sa idalom sang Bayanihan Bakunahan.
Gani humalin kaina sang aga, dagsa man ang mga nagpabakuna sa mga vaccination center sa kabarangayan, mga eskwelahan kag sa mga mall sa siudad.
Ang iloy kag 4Ps beneficiary nga si Nena Pedrosa, nagbaton sang first dose sa Bacolod City National High School matapos maenganyo sang iya mga abyan nga magpabakuna.
Sa Jose R. Torres Elementary School sa barangay sincang airport, manug las dose na sang udto pero amo pa sini kadamo sang naga pila para magpa bakuna.
Kinyentos ka dose sang bakuna ang allocation sang barangay pero nag dugang pa gid sila sang halos kinyentos pa gid ka dose.
Isa sa mga nagpila ang lola nga si lorna navarro ginpa bakunahan ang iya dose anyos nga apo. Luyag niya nga kun magbalik na ang face to face nga klase, protektado na ini siya kontra sa virus.
Nagapati ang pamunuan sang EOC nga mangin dako nga bulig kontra sa makamamatay nga virus ang tatlo ka adlaw nga National Vaccination Days.
May 66 mil ang target quota sang siudad sa sulod sang tatlo ka adlaw kag ginalauman nga antes matapos ang tuig malambot sang Bacolod ang 70 percent herd immunity.