Nagsugod na subong nga adlaw ang pag-release sang year-end bonus kag cash gift para sa masobra 2,000 ka mga regular, plantilla kag casual employees sang Bacolod City LGU.
Isa ka bulan nga sweldo ang mabaton sang tagsa ka empleyado bilang year-end bonus, samtang 5,000 pesos naman ang cash gift. Una nga makabaton ang mga departamento nga nakauna man pasa sang tanan nga requirements.
Sa idalum sang pagsulundan sang Department of Budget and Management, isa sa kwalipikasyon agud makakuha sang bonus ang isa ka empleyado, amo nga kinahanglan naka render siya sang apat ka bulan nga serbisyo sini nga tuig bilang regular, plantilla, ukon casual employees.
Ginsiling ni Bacolod City Mayor Greg Gasataya, nga magluwas sini may ginpain naman nga pondo ang siudad para Collective Negotiation Agreement ukon CNA bonus nga sarang man makuha sang mga empleyado.
Apang sa karun, nag-apela pa ang siudad sa DBM nga parehoson na lang ang guidelines sa tinalikdan nga tuig bangud may mga pagbag-o sa pagsulundan sang DBM sa karon.
Ang CNA Bonus ang isa ka one-time incentive nga sarang mabaton sang isa ka empleyado kada December. Sarang ini makadangat sa 30,000 pesos.
Una naman nga ginsiling sang alkalde nga may yara man sang gratuity pay nga ihatag ang siudad para sa mga Job Order Employees.
[sibwp_form id=1]