Sa tunga sang panawagan karon sang mga healthcare workers nga ma-release ang ila nga health emergency allowance, DOH Undersecretary nagsiling nga sa karon ang gina hulat na lamang ang Department of Budget and Management para tigayon nga ma download ang pondo.
Sa Negros Occidental nga healthcare workers gikan sa siyam ka mga District Hospitals kag may pipila man gikan sa Provincial Health Office ang tubtob sa karon naga hulat nga ma release ang ila nga HEA.
Sa kabilugan may 202.8 million pesos ang gina paabot nga ma release nga pondo para sa sining mga healthcare workers nga nagserbe sang tion sang COVID-19 pandemic.
Sa interview sang katapo sang media kay Department of Health Undersecretary, Dr Mary Ann Maestral ginpahayag sini nga sa bahin sang probinsya kag sang Regional DOH ang tanan nga papeles ang tigayon na nga na comply.
Mismo si Provincial Health Officer, Dr Girlie Pinongan ang nagsulat na kay DOH Regional Director, Dr Adriano Suba-an para mag follow-up.
Sa tunga man sang naga gwa nga fake news, paathag ni Maestral may budget na nga napain para diri, ang mga papeles nga kinahanglanon na comply naman kag ini tanan yara na karon sa DBM.
Kun san-o gid ma download, ini ang hulaton. Dugang pa niya, indi man lamang ang Negros Occidental ang naga atubang sang amo nga problema kundi pati ang iban man nga probinsya.
Kun may mga healthcare workers nga gikan sa mga LGU ang natigayon na nga na releasan sang pondo ini bangud diutay lamang sila kag base sa sistema mas madasig ang pag proseso sa ila kun ipaanggid sa mas dalagko ukon sa mas may madamo nga personnel.