Mayor Albee Benitez upod sa DSSD maga-atubang sa natalana nga senate hearing angut sa mga peke nga PWD IDs.
Magatambong bilang resource speaker sanday Mayor Albee kag DSSD OIC Alma Gustilo sa natalana nga senate hearing agud magpaathag kag mag-present sang tikang angut sa pagtapna sang mga natalupangdan nga mga peke nga mga PWD IDs sa siudad.
Si Senador Sherwin Gatchalian ang nag-imbitar sa alkalde sa tuyo nga matagaan atensyon ang kaso sang tax leakages nga natuga sang mga nagapamentaha sa benepisyo sang PWD ID cards.
Nagligad lang nga Pebrero sang ginpa-recall sang alkalde ang mga PWD ID cards matapos matalupangdan nga ginapang-peke ang mga government issued documents halin sa mga business permits kag pati na senior citizen IDs.
Masobra 100 ka mga PWD IDs ang nabawi bangud peke kag iban tampered.
Ginpang-islan ini sang QR coded nga cards sa tuyo nga indi ini mahapos nga mapeke kag gamiton sa pagpamentaha.
Isa man ka printing services ang napat-ud nagapanghimo sang peke nga mga government issued documents.
Ginpasakaan na sang kaso ang empleyado nga nadakpan sa akto nagapanghimo sang fake documents.