Nangin madata na ang reklamo sa social media sa puerto sang Dumaguete City nga kadamo na katama sang fixers kag daw wala na sang sistema sa pagsakay sa mga ferry boat pa isla sang Siquijor.
Isa ka bagay nga indi manami para sa imahe sang Negros Oriental nga isa ka tourist friendly city.
Gani si Negros Oriental Governor Manuel Sagarbarria, pinaagi sa isa ka sulat ang nag pangayo sang paathag gikan sa Philippine Ports Authority ukon PPA kag Marina kun ano nga mga tikang ang ila nga gina himo sa tunga sang reklamo batuk sa pagtuhaw sang fixers sa pagkuha sang fast craft tickets pakadto sa isla sang Siquijor.
Suno sa gobernador luyag niya man ini ipausisa sa Sangguniang Panlalawigan sang probinsya.
Ang Siquijor ang isa sa mga ginadagsa karon nga isla sa Pilipinas sang mga turista kag bangud sang reklamo batuk sa fixers suno sa gobernador ang iban nga turista naga pangita na lang sang iban nga alternatibo nga alagyan pa Siquijor.