Sa pagsinapol sang katapo sang Disaster Risk Reduction Management Office upod sa pamunuan sang Bacolod City College gin-recommend ang pagpatuman sang hugot nga pag usisa sang mga bags sang estudyante.
Ini matapos nga may 22 ka first year student kag duha pa ka mga POSO guard ang nalipong kag nabudlayan sa pag ginhawa sang mahaklo ang colored smoke nga gingamit sa performance activity sa sulod sang activity center sang Lunes.
Suno kay acting Mayor El Cid Familiaran ginduso man ang pag regulate sang pagbakal kag pag gamit sang kasubong nga smoke bomb products agud nga mapaiway ang kasubong nga insidente.
Naka gwa na sa ospital ang mga estudyante pati na ang mga POSO guards nga nag report naman sa trabaho.
Pero nagapabilin pa nga sarado ang activity center para sa assessment sang DRRMO.