Presidente Ferdinand Marcos Jr ang nag announce na sang suspension sang tanan nga rice importation sa sulod sang 60 diyas sumugod Setyembre 1.
Ini bilang sabat sa sitwasyon sang mga rice farmers nga naga pangayo sang bulig sa tunga sang barato nga presyo sang baklanay sang palay.
Pila sa mga grupo sang rice farmers sa Negros Occidental ang naga laum nga maga saka man kuntani ang presyo sang baklanay sang palay.
Suno kay Pedro Limpangog ang presidente sang Federation of Irrigitors Association – Central Negros – Bago River Irrigation System sadto yara sa 14 tubtob 15 pesos ang kilo sang baklanay sang palay.
Ang capital sang mga mangunguma 13 pesos.
Halos indi sila makabawi.
Gin mando na ni Presidente Marcos nga mangin 18 pesos na ang baklanay suno sa iya.
Mas maayo pa gid kuntani magdangat sa 20 tubtob 30 pesos ang baklanay suno kay Limpangog.
Naga panawagan sila sang tikang para mag maayo man ang presyo sang baklanay sang humay nga indi man maapektuhan ang presyo sang bugas.
Suno kay Limpangog ginsuportahan nila ang House Bill no. 1 ukon ang Rice Industry and Consumer Empowerment Act nga gin file mismo ni Speaker Martin Romualdez.
Isa sa mga tuyo sini amo ang pag restore sang regulatory powers sang National Food Authority sa pag intervene sa rice market kag pag dumili sang hoarding, profiteering kag price manipulation, lakip na ang pag correct sang Rice Tarrification Law.
Gina abi-abi ni Governor Eugenio Jose Lacson ang tikang sang presidente nga naga tuyo mag pangapin sang interes sang mangunguma.
“Ang farm gate price sang palay, kay ang aton presidente nagmando na gid man nga ang NFA mamakal sang humay – fresh palay sa tag P18/kilo. Kuntani mas nami pag gid pataasan ang farm gate price, fresh palay from 20 to 30 pesos. Para si mangunguma naton malipay pa gid or mabuhi man ang ila nga pamilya”, suno kay Limpangog.