Solid Waste Management Board nag recommend para sa 4-month extension sang kontrata sang IPM.
Sa pagsinapol sang katapo sang Solid Waste Management Board nakasugtan ang pag-extend sang kontrata sang IPM-CDC nga amo ang nagaserbe private garbage collector sang siudad kag nagadumala sang sanitary landfill sa Barangay Felisa.
Suno kay Councilor Claudio Puentevella, pamuno sang Committee on Environment sang konseho, gina-consider sang katapo sang board ang plano ni Mayor Albee Benitez nga pagpaidalom sang garbage collection sa Private Public Partnership project.
Ugaling nahangpan nila nga mahimo malawigan pa ang proseso ilabi na ang pagpatukod sang bag-o nga sanitary landfill kag subong man ang recycling facility amo nga kinahanglan mapadayon anay ang serbisyo sang IPM sa apat ka bulan.
Sa Disyembre maga-expire na ang kontrata sang IPM sa siudad.
Sa Mayo man ginapaabot nga mapuno na ang landfill amo nga kinahanglan matigayon ang construction sa bag-o nga landfill.
Itukod ini sa sulod sang kapin 30 ektarya nga propiedad nga baklon sang siudad sa Barangay Felisa.