Pag-appoint sang mga regional director sa idalom sang Negros Island Region ginduso nga mapadasig sa pagsinapol sang House Committee on Visayas Development.
Ang pagtukod sang mga regional offices pati na satellite regional offices nga ginakinahanglan karon nga operational na ang Negros Island Region ang luyag mapasiguro sang katapo sang House Committee on Visayas Development.
Sa ila pagsinapol ginduso ni Mayor Albee Benitez nga dapat mapadasig ang pag-appoint sang mga magaserbe nga regional directors nga kinahanglan para mapabaskog ang panghimanwa sa rehiyon nga ginalakipan sang Negros Occidental, Negros Oriental kag Siquijor.
Sa idalom sang Republic Act 12000 nga nag-establish sang NIR, nakasaad ang pagtukod sang regional offices sa Negros Occidental para sa agriculture kag land-related cluster, peace and order and security cluster, governance cluster, human development cluster, infrastructure cluster, industry kag labor cluster.
Ginpahayag ni 5th District Congressman Emilio Yulo nga kabahin sa paga-istoryahan sa pagsinapol ang bahin sa budget sang mga regional offices nga igalakip sa National Expenditure Program sa 2026.
Sa proclamation rally sang mga senatorial candidates sa idalom sang Alyansa para sa Bagong Pilipinas sa probinsya ila ginpasalig ang paghatag sang prayoridad sa budget sang NIR.