Shadow

P7.5M nga balor sang school supplies kag equipment gin-turn-over sa Deped-Sagay

Sagay LGU photo

Gin-turn-over sang lokal nga panguluhan sang Sagay ang mga school supplies kag equipment nga naga balor sang P7.5M sa Department of Education – Sagay City Division kadungan sa launching sang Project Lapis kag Papel Year 3 sang nagligad nga Miyerkules.

Ang siudad ang nagpain sang P4,012,257 nga balor sang school supplies para sa 11,690 ka mga estudyante sang Sagay nga yara sa kinder tubtob grade three.
P3.5-million naman nga balor sang High-Speed Comcolor Printer Machine with Sorting and Stapling Features ang ginhatag.

Sa press release sang Sagay City nasaad nga ang P4M budget nag gikan sa General Appropriation Act (GAA) funds samtang ang budget para sa printer ang nag gikan naman sa pondo sang Local School Board.

Ang GAA allocation nagalakip man sang donation sang Knowledge Channel nga Portable Media Library sa 53 ka mga elementary schools kag tanan nga Secondary Junior High Schools, kasubong man radio cassettes para sa 2,135 students.
Ang high-speed printer machine nagatuyo sa pagbulig sa mga manunudlo para sa Self-Learning Modules (SLMs) para sa mga estudyante sang Sagay.

Ginsiling ni Mayor Alfredo Maranon, III, nga ginduso ang Project Lapis kag Papel sini nga tuig bangud nakit-an sang siudad ang ka kinahanglanon sa pagbulig sa mga kabataan sa tunga sang pandemya.

Ginahaylo naman ni Maranon ang mga ginikanan nga buligan ang ila nga kabataan sa sining panibag-o nga paagi sang pagtuon.
Ang siudad naman suno kay Maranon ang magabulig sa mga kinahanglanon sang estudyante para mas mapaayo ang ila nga academic performance.

Samtang, ang lokal nga panguluhan Sang Sagay kag ang talatapan ni Second Disctrict Representative Leo Rafael Cueva ang nag donate sang 1,800 ka mga payong sa mga teaching kag non-teaching personnel sang DepEd Sagay City Division agudto ila magamit sa tion nga sila ang maga panagtag sang SLM.

Leave a Reply

Your email address will not be published. Required fields are marked *

Secured By miniOrangeSecured By miniOrange