Sugod karon nga Hunyo, ibalik sang Central Negros Electric Cooperative sa mga kunsomidor ang estimated P11 million nga monthly refund sa sulod sang duha ka tuig.
Ini matapos ginmanduan sila sang Energy Regulatory Commission nga ibalik ang masobra P237 million pesos nga over-under collection humalin sang 2004 tubtob 2017.
Ang refund ang ipatuman paagi sa igabuhin nga balayran sa monthly billing sang masobra 213 mil ka mga consumers.
Ini ang magabase sa power consumption sang tagsa ka mga kunsomidor.
Ginsiling ni ERC commissioner kag CEO Agnes Devanadera nga nabase ini sa aproved modification sa application sang Ceneco kag duha pa ka mga power distributor sa over kag under recoveries sa automatic cost adjustment kag true up mechanism.
Ginpaathag sang Ceneco nga refund kabahin sang collection adjustment kag wala sang overcharging nga ginpatuman sa mga kunsomidor.
Magafile man ang Ceneco sang motion for reconsideration sa nangin desisyon sang ERC.
Gin-ako sang pamunuan sang Ceneco nga maka-apekto ini sa financial stability sang electric cooperative amo nga mas pabaskugon pa nila ang collection operation pati na ang pagtapna sang kaso sang kinawatay sang supply sang kuryente.
Sa record sang Ceneco nagalab-ot sa P320 million ang sytems loss sang Ceneco kada tuig tuga man sang pilferage.
Samtang, maga file man sang motion for reconsideration ang Ceneco management sa mandu sang Department of Labor and Employment nga ipatuman na mga ang nakasugtan sa Collective Barganing Agreement pabor sa katapo sang Ceneco Union of Rational Employees ukon CURE.
Nalakip diri ang dugang nga saka sa sweldo, bonuses kag allowance pati na dugang nga educational assistance.
Ang DOLE ang may assumption of jurisdiction sa Ceneco tungod man sang nagluntad nga labor dispute sa tunga sang management kag labor union.