Shadow

Kahadlok sang mga pumuluyo magpa check up bangud sa swab test isa sa mga gina lantaw nga rason sa pagsaka sang dengue cases

Ang Barangay Singcang Airport isa sa mga coastal barangay sa Bacolod nga madamo ang swampy areas ukon mga lamawan nga masami gina-istaran sang lamok.

Isa ini sa mga kabangdanan suno head nurse sang barangay health center kun ngaa madamo man karon ang dengue cases sa lugar.

May 17 na ang kaso sang dengue sa Barangay Singcang, pinakamadamo ini sa tanan nga mga barangay sa Bacolod.

May apat na ang napatay tungod sa dengue, isa diri ang 11 anyos nga bata nga lalaki nga residente man sang Barangay Singcang-Airport.

Ang 8 ka tuig nga apo nga babaye sang barangay health worker nga si Sarah Yaun, ginhilanat man kag na diagnose nga may urinary tract infection sang nagligad nga Marso.

Bangud sang kabalaka, wala sila nagkumpyansa kag ginpa check ang bata kag ginpa-admit sa ospital asta nga nag-ayo.

Ang mga pagsulundan sa pag-pa check up ilabi na sa mga ospital, kabahin diri ang swab test ukon RT PCR test isa sa mga gina lantaw nga rason kun ngaa madamo sa mga dengue patients ilabi na mga magagmay nga kabataan ang wala naga pa konsulta gilayon sa doktor.

Suno kay Dr. Grace Tan, pamuno sang City Epidemiological Surveillance Unit, magluwas sa mga ospital may yara man sang dengue fast lane sa sulod sang City Health Office compound nga sarang kadtuan sang mga pasyente nga makitaan sang sintomas sang dengue.

Masobra sa 72 porsyiento na ang ginsaka sang kadamuon sang dengue cases karon nga period.

Ang CHO upod sa Disaster Risk Reduction Management Office ang nagapang hatag sang larvicides kag padayon ang ginapatuman nga fogging kag declogging operation agud mapunggan ang pagsaka sang
Dengue cases sa mga kabarangayan.

Pero kulang ini suno kay tan bangud importante man ang magbulig ang pumuluyo sa pagpanglimpyo sang palibot pati na sa sulod sang ila panimalay agud matapna ang pagdamo sang lamok nga nagadala sang makamamatay nga balatian.

Secured By miniOrangeSecured By miniOrange