Shadow

OIC COMELEC officer sa Bacolod nagpa athag nga naga sunod lang siya sa mando sa iya

YouTube player

Kaagahon pa lang nag-idas na ang linya sang luyag magparehistro halin sa Bacolod Comelec Office pakadto sa malapit nga mall sa Reclamation Area.

Ulihi na sila nakabaton sang abiso nga sa ayala mall ang voters’ registration bangud sirado pa ang Comelec office.

Gani ang pila ka mga iloy nga nag-apas pa sa Bacolod Comelec office ang nahul-an bangud kutob lang sa 300 ang sarang ma-accommodate sang Comelec sa kada adlaw.

Pati ang anay mayor sang Don Salvador Benedicto nga si Atty. Joe Max Ortiz wala man gilayon maka-file sang transfer of voters registration.

Tuyo niya nga magbalhin sa Bacolod agud makapapili sa pagka-konsehal sang siudad.

Suno kay Provincial Comelec Supervisor Atty. Ma. Fatima Aspan, ang karon acting Comelec officer sang Bacolod, nga dako nga kabudlayan para sa ila ang nagapadayon nga pandemic ilabi na nga ginakulang sila sang personnel.

Onse sa katapo sang Bacolod Comelec office nalakip na si City Election Officer Atty. Kathrina Trinio Cana ang nagapaidalom sa quarantine bisan pa negatibo na sa RT-PCR test.

Ini makaligad isa sa ila kaupod nga empleyado ang nagpositibo sa Covid-19.

Ginsiling man ni Aspan nga indi malikawan ang mga reklamu, nalakip na diri ang paghinyo ni Mayor Evelio Leonardia sa iya nga mag-inhibit sa ginahimo nga pagpanguna sa ginapatuman nga voters registration.

Sa sulat sang alkalde nga napalab-ot sa Comelec Regional Office, iya gintumod ang tuman ka damo nga transferee-registrants halin sa gwa sang Bacolod, kadam-an diri gikan sa mga lugar nga ginserbisyohan ni anay congressman Alfredo Benitez iya na kwestyon ang intergridad ni Aspan.

Si Benitez ang maga engkwentro kay Leonardia sa natalana nga 2022 mayoralty elections.

Si Aspan ang nangin anay election officer sa Victorias City sa diin nagserbi man si Benitez bilang kongresista sang third district.

Sa Sabado na lamang kutob ang pagserbi ni aspan bilang acting Comelec officer sang Bacolod kadungan sang pagbalik man ni Trinio kag sang pila pa ka mga empleyado halin sa quarantine.
Bwas magapadayon ang voters registration sa Ayala Mall.

Secured By miniOrangeSecured By miniOrange