Kapin 800 ka mga panimalay gikan sa anum ka mga purok sang Barangay Handumanan ang nagpasakop sa “No Segregation, No Collection” policy sang siudad nga pormal na nga ginlunsar Biyernes sang aga.
Ginsiling Punong Barangay Ma. Febe Legaspi nga madamo sang basura nga nagakakita ang barangay sa palibot, kag ang ini nga programa ang ginalantaw nga isa sa solusyon agud mapahagan-hagan ang pagtumpok sang basura sa kilid sang dalan.
Una ini anay nga ipatuman sa pilot puroks agud ma-assess ang participation kag kun epektibo gid man ang tikang sang siudad sa pag segregate sang basura.
Sa karun, ginamanduan ang tagsa ka balay kag mga negosyo nga nasakpan sang pilot areas nga magbutang sang duha ka basurahan sa ila balay para ma segregate ang madunot sa indi madunot. Kada las 8 sang aga, pagakuhaon sang barangay ang basura, apang kinahanglan nga nakasulod ini sa transaprent plastic agud makita nga naka segregate ini.
Indi man pagkwaon sang barangay ang basura kun wala ini na segregate sang insakto. Ang madunot nga mga basura ang igaul-ong sa National Economic Development Foundation para mangin fertilizer samtang ang indi naman madunot ang ihaboy na sa sanitary landfill sa Barangay Felisa.
May kasugtanan naman ang mga residente kag commercial establishments sa barangay may angut sa amo nga programa suno sa Kapitan. Dugang ni Legaspi, ipatawag sang barangay ang kutob sa mga residente nga wala nagasunod sa amo nga programa.
Una na nga ginsiling ni Bacolod City Mayor Greg Gasataya nga kun mangin epektibo ang ini nga tikang sa Barangay Handumanan, ginapaabot man nga mapatuman ini sa iban pagid nga mga barangay nga naga problema sa basura.
[sibwp_form id=1]