Masobra sa 130,000 ang tigayon nga nag parehistro sa Negros Island Region sa napulo ka adlaw nga voter registration nga ginpatigayon sang Commission on Elections.
Overwhelming ukon wala gina lauman sang COMELEC suno kay Negros Island Region Director, Atty Lionel Marco Castillano ang kadamuon.
Kalabanan pa gid suno sa iya ang mga first time voters ukon ang yadtong naga pang edaron 15 tubtob 17 years old kag 18 anyos.
Nalipay ang COMELEC sa resulta suno sa iya. Ang Negros Occidental may 78,313 nga nag pa rehistro, ang Negros Oriental naman 47,648 kag Siquijor, 4,417.
Kabilugan, ini ang nagdangat sa 130,378.
“Overwhelming ang turnout. I’m very glad that ang mga youth came out. Because nabigyan talaga sila ng pagkakataong mag rehistro. Hindi man tayo tumanggap ng mga transfer, IBIG sabihin nun naka concentrate kami sa 15 to 17 at tsaka yung mga 18 years old na first time voters. Wala kasing transfer from one place to another”, suno kay Castillano.
Ang tuman nga pag dagsa sang mga maga parehistro sa Bacolod labi sang mga pamatan-on suno kay Castillano ang wala nila ginlauman.
May mga kabataan nga nagpila sang gab-i pa lang.
Sa video nga kuha ni JO EL, Sabado las 6 sang aga makita ang pag punsok sang mga maga pa rehistro suno sa iya sagwa sang Robinsons Mall, ang iban naga dinalagan sa gina patihan pag pila.
Suno kay Castillano, sa amo nga eksperiensya, kinahanglan na suno sa iya sang coordination sa security sa mall kag sa pulis.
Kag kinahanglan man sang dugang nga voter registration machine ang Bacolod.
Tatlo lang ang yara sa Bacolod nga dapat kuntani lima na sa kadakuon sang Bacolod.
Gina paabot man ang pag lagda sang presidente sang postponement sang BSKE, suno kay Castillano ginahulat ang posible pag file man sang petition kontra sa postponement.
Kun madayon man ang postponement sang BSKE, maga resume sa last week sang October suno sa iya ang voter registration tubtob na sa Hulyo 2026.
Kun indi man, ang madason nga tikang sang COMELEC amo ang pag patigayon sang ERB hearing sa pag approve ukon disapprove sang mga nag apply nga botante.
