Tuesday, November 17

Night markets ipahamtang sa nag kalain-lain nga area sa Bacolod para sa Batang Pinoy

Ginsiling ni Bacolod City Administrator Atty. Mark Steven Mayo nga plano sang siudad nga butangan sang mga night markets ang pila ka mga mayor nga mga dalanon sa Bacolod City agud mag-ganyat sang mga turista kag atleta kadungan sang Batang Pinoy 2026 sa Disyembre 12 tubtob 18 sini nga tuig.

Suno kay Mayo, luyag sang siudad nga hatagan sang maayo nga pwesto ang mga ambulant vendors agud maka-income man sila sa pag-abot sang mga bisita gikan sa masobra 200 ka mga LGUs. Ginapaabot nga magkadto sa Bacolod City ang masobra 35,000 ka mga atleta para sa amo nga kompetisyon.

Lakip sa mga pahamtangan sang night market amo ang The Upper East sang Megaworld, Bacolod City Public Plaza, kag ang palibot sang Bacolod City Government Center.

Samtang, natalana naman nga sa una nga semana sang Disyembre, masaylo na ang mga vendors sa palibot sang BCGC sa isa ka pribado nga lugar nga ginapanag-iyahan sang pamilya Gonzaga sa likod sang BCGC.

Nagsapul naman ang LGU sa mga restaurants kag mga catering services sa Bacolod agud masiguro nga indi mabutang sa alang-alang ang pag book sang mga bisita sa ila mga posible nga kalan-an.

Ginpasa naman sang siudad sa Philippine Sports Commission ang listahan sang mga legit nga food providers sa Bacolod agud may basehan ang mga bisita kun sa diin sila pwede maka inquire para sa ila pagkaon.

[sibwp_form id=1]
Secured By miniOrangeSecured By miniOrange