Probinsya sang Negros Occidental ang maga hatag sang P2M bilang bulig sa Bogo City sa Cebu nga naigo sang 6.9 magnitude nga linog sang Setyembre 30.
Ini suno kay Governor Eugenio Jose Lacson nga nagsiling man nga iga adopt sang probinsya ang Bogo City.
Sang nagligad nga semana sa idalom sang One Negros Response Team nag padala sang teams kag assets para bulig sa Cebu.
Nalakip diri ang mga teams kag assets gikan sa San Carlos City, Sipalay City, Silay City, Sagay City, Cadiz City, Talisay City, Escalante City, Victorias City kag banwa sang Toboso.
Suno kay Lacson sa Biyernes mahimo nga maga balik na sa probinsya ang mga teams magluwas lamang sa Victorias City nga nag abot sini nga adlaw sa Cebu.
Suno kay Irene Bel Ploteña ang pamuno sang Provincial Disaster Risk Reduction Management Office, as of October 5, 92,100 liters sang tubig ang natigayon panagtag sa duha ka adlaw nga operation. 4,605 ka individuals ukon 921 families ang tigayon nga naserbehan.
Ginapasalamatan sang gobernador ang pag unong kag pag-isa sang mga LGU para sa Cebu kag iya gina haylo ang iban nga LGU sa probinsya nga kun masarangan man lamang sang ila nga budget mag padala man sang financial assistance sa mga apektado nga LGU sa Cebu.