Probinsya sang Negros Occidental ang maga comply sa patakaran sang COMELEC may kaangtanan sa pagpatuman sang ban sa mga ayuda sakop ang pagbaligya sang 20 pesos nga kilo sang bugas.
Pero, may mga bagay pa sila nga luyag ma klaruhan bahin sa proseso sang baligyaanay.
Ginsiling ni Provincial Administrator Rayfrando Diaz nga personal na sila naka hinun-anon kay Department of Agriculture Regional Director Jose Albert Barrogo.
Pila sa ila nga concern nga napadangat sa DA amo ang bahin sa pag baligya sang bugas – sin-o man ang paga tugyanan sa pag baligya sang bugas lakip na ang permiso nila sa pagbaligya sini, ang pagpasiguro nga sa tig P20/kilo gid man ang pag baligya kag sa libro paano pagakabigon sang probinsya ang P20 nga benta.
“May na plastar sila but they’re leaving everything to the LGUs, pero indi man klaro kun paano si LGU maka implement sina nga wala man balik nga liabilities”, suno kay Diaz.
Suno kay Diaz sa bahin sang probinsya may duha na ka tuig paagi sa Bigasan ng Bayan upod ang pederasyon sang mga association sang irrigators naga baligya na sang barato nga bugas sa mga indigents, PWDs, senior citizen kag iban pa gid nga sektor sa tig lima ka kilo nga maximum sa tig P25/kilo.
Isa sa gina lantaw sang probinsya nga kun pwede nila maayo ang grupo nga panubuan pa gid ang presyo para mangin P20/kilo ang baligyaan.
Pasalig ni Diaz nga himuon sang probinsya ang masarangan sini para sa programa sang presidente santo sa patakaran man sang COA kag sa aspeto legal.
“We cannot just act and later think along the way kun ang aton na obra tsakto kun indi”, suno kay Diaz.
May 7 million pesos nga pondo ang probinsya para sa programa.
Sa karon may 5,800 ka sako sang bugas sa NFA nga available para sa food security emergency program.