Mga Negrense athletes nga nagdaog sang medalya sa Palarong Pambansa 2025 ang nagbaton kaina sang aga sang ila nga cash incentive gikan sa probinsya sang Negros Occidental.
Mga record breaker ang may dugang nga incentive.
Si Negros Occidental Governor Eugenio Jose Lacson upod kay Department of Education NIR Director, Ramir Uytico sa isa ka seremonya sa Social Hall sa Capitol ang nag release sang incentives.
10,000 pesos ang incentive para sa nagdaog sang gold, 7,000 pesos ang nagdaog sang silver medal kag 4,000 pesos ang bronze medalist. May dugang nga 10,000 pesos para naman sa mga nag break sang record sa tagsa ka sport event.
Nanguna sa mga atleta si Miko Villaran sang Romanito Maravilla National High School sa Bacolod nga record breaker sa Athletics kag nagdaog sang duha ka gold para sa 400-meter hurdles kag 110-meter hurdles, isa ka silver kag isa ka bronze sa 4×400 meter relay.
Record breaker man ang gold medalist nga si Christine Rose Toquero sang Binaguiohan Elementary School sa Escanlante City para sa javelin throw.
18 tanan ka mga gold ang gindaog sang Negros Occidental sa Palarong Pambansa, pinaka madamo nga contribution para sa Western Visayas medal haul.
Masobra sa 1.3 million pesos tanan ang na-release nga pondo para sa mga Palarong Pambansa medalist.
Sa madason nga tuig, maga compete na ang Negros Occidental sa idalom sang Negros Island Region, bagay nga suno kay Uytico ang gina handaan na.