May lead kag “persons of interest” na ang Manapla PNP sa kaso nga pagpatay sa isa ka negosyante nga anay Overseas Filipino worker sa Purok Suaga, Barangay I-A sa banwa sang Manapla, Domingo sang aga.
Base sa imbestigasyon, may igo sang bala sa nawala nga dulunggan kag ulo ang biktima nga ginkilala kay alyas “Mau”, 57-anyos, residente sang nasambit nga barangay.
Nagwa sa imbestigasyon nga papauli na kag nagamaneho sang iya salakyan si alyas “Mau” upod sang iya asawa nga maestra, sang gintiro ang biktima sang makapila ka beses sang gunman nga nakasuksok sang delargo, itom nga jacket kag naka-bonnet.
Ang gunman ang naga-angkas sa motor nga ginamaneho sang isa pa gid ka persona.
Apisar nga natiruhan na ang biktima, siya ang nagapaandar pa sang iya salakyan mga 30 metros gikan sa crime scene, tubtob nga nagpundo sa tunga sang dalan.
Nakaluwas ang asawa apang gindeklarar nga dead on arrival sa ospital ang iya bana.
Na-recover sa crime scene ang lima ka empty shells kag isa ka deformed fired bullet sang wala pa mahibaluan nga caliber sang pusil.
“May mga persons of interest na kami nga gina-consider but yet it is for case build-up pa so indi pa namon ma reveal as of this time. May possible motive na kami nga gina-develop pero we could not reveal it to the public considering that it is still under investigation. Actually may idea kami ni ya kung sino ang tawo before nga daw nag-atrasohay gid sila, wala labot sang insidente di nga naging siya ang complainant. Amo na ang isa sa gina-consider namon which is ginapanan-aw namon may could still have the capacity nga maghimo sini”, suno kay Capt. Marion Vicente Buenaflor ang Manapla PNP chief.
[sibwp_form id=1]