Dead on arrival ang driver sang motor samtang pilason ang duha ka mga angkas sini matapos nakabunggo sila sa likod sa nagapondo nga truck sa outer lane sang national highway sakop sang Purok Yee-on, Barangay Cabahug sa Cadiz City, Sabado sang gab-i.
Gindala sa Cadiz District Hospital ang tatlo apang napatay ang driver nga si alyas “Abel”, 34-anyos, samtang pilason ang back-riders nga sanday alyas “Ronnie” kag alyas “Pedmon”.
Nagwa sa imbestigasyon nga padulong sa direksyon sang Bacolod City ang motor sang nakabunggo ini sa bumper sa likod nga bahin sang truck.
May narekober ang pulis nga traffic cone sa lugar apang indi ini reflectorized.
Samtang, duha ka mag-amigohay patay sang makabunggo ang ila ginasakyan nga motor sa carabao sa Hacienda Santo Rosario, Barangay Guimbalaon sa Silay City, Domingo sang kaagahon.
Ginsiling ni Lt. Col. Edison Garcia, hepe sang Silay PNP nga una nga napatay ang driver sang motor kag sang ulihi, ginbawian man sang kabuhi ang angkas sini.
Gikan sa isa ka sitio sa Guimbalaon ang mag-amigohay kag padulong sa proper sang ila masugata ang carabao nga nakabuhi.
Ang carabao ang buhi, suno sa hepe.
Yara sa 19 kag 20 anyos ang edad sang mag-amigohay suno sa pulis.
“Basi gulpiyada siguro nga nagtabok kay kaagahon na mong. Indi man gid madulom ang area galing kay gulpihay nga nagwa kag nag-ilinaway ang karabaw, nakabuhi.. May settlement nga ma-istorya sila karon sa hapon”, suno kay Garcia.
[sibwp_form id=1]