Duha ang patay kag isa ang pilason sa nagluntad nga shooting incident sa Dancalan Public Plaza, Barangay Dancalan sa banwa sang Ilog, Martes sang aga.
Gintiro sang suspek ang negosyante nga ginkilala kay Philip George Vail Sr., chairman of the board sang Dancalan Private Academy.
Ginbawian sang kabuhi ang negosyante, samtang may isa pa gid ka sibilyan ang nasamaran matapos nga nasalabat sang bala.
Natabuan nga may duha ka naga patrolya nga pulis malapit sa lugar sang insidente.
Suno kay Major Randy Babor, hepe sang Ilog Police Station, nagresponde ang duha ka pulis matapos makabati sang lupok kag naabtan ang suspek nga hana malagyo, sakay sa motorsiklo.
Ginsita sang pulis ang suspek apang nagbato ini, rason nga ila siya gintiro.
Nakakuha ang kapulisan sang mga basiyo sang bala kag duha ka mga pusil, isa gikan sa suspek kag ang isa ang narekober malapit sa lawas sang negosyante nga biktima.
Suno kay Babor, may angut sa negosyo ang anggulo nga ila ginalantaw sa pagpatay sa negosyante.
Nakilal-an na ang suspek apang indi pa mapalayag ang iya ngalan kag padayon pa ang background checking sang kapulisan agud mahibaluan kunn siya ang may iban nga mga kaso.
