Ginkumpirmar ni Bacolod City Deputy Fire Marshall Fire Inspector Jemarie Tapiru nga ang ginhalinan sang sunog sa Purok Magnolia Barangay 7, Bacolod City kahapon nga adlaw amo ang naglupok nga linya sang kuryente sang suga.
Base sa ila imbestigasyon, nagsugod ang kalayo sang naglupok ang linya sang amo nga suga sa second floor sang balay ni Larry Peruelo.
Duha man ang na rekord nga nasamaran bangud sa sunog. Ang isa nakaangkaon sang mga paso sa nawala nga hita, siko, palad, kag tudlo samtang ang isa naman nakaangkon man sa paso sa nawala nga kamot.
26 ka balay ang gintupok sang kalayo. 21 diri ang totally damaged samtang may lima naman nga partially damaged. Nagdangat sa masobra sa tunga sa milyon ka pesos ang halit sang amo nga sunog.
Suno sa Department of Social Services and Development, 62 ka pamilya ukon 178 ka indibidwal ang apektado lakip na diri ang 32 ka mga renters.
Sa record sang Bureau of Fire Protection, isa sa pinakadamo nga cause of fire sa Bacolod City sang tinalikdan nga tuig amo ang electrical ignition.
Samtang, humalin Enero sini nga tuig, masobra na sa 10 ka sunog ang na record sang BFP nga gintunaan sang electrical ignition.
Panawagan naman sang BFP sa publiko, ilabi na sa nagaistar sa mga red zone areas, likawan pagsaksak sang madamo nga appliances sa isa lamang ka outlet.*
[sibwp_form id=1]