
Nasapwan na lamang ang mga nagaka agnas na nga bangkay sang mag utod nga Lito Moreno, 24-anyos kag Jason Moreno, 29-anyos sa Sitio Mantuhod, Barangay Cabacungan, La Castellana kaina sang aga. May mga pilas ang ila nga mga lawas.
Sa report sang La Castellana PNP, mga resident sila sang Sitio Malig-on, Brgy. Upper Linothangan, Canlaon City, Negros Oriental.
Suno sa incoming punong barangay sang Cabacungan nga si Marvin Palmares Escander, sa nabaton nila nga impormasyon Martes pa nga ginreport nga missing ang duha.
May abyan sila nga nagdala sa ila sa Cabacungan.
Ginpa blotter sang himata sang mga biktima nga missing sila kag kaina sang aga sang nagwa sa social media ang mga litrato sang bangkay, ginkadtuan ini sang pamilya kag ila nga nakumpirma nga ila gid man ini nga mga himata.
Ipa autopsy sang PNP ang mga bangkay para matumod kun ano ang ila nga ginkamatay samtang naga padayon naman ang imbestigasyon sang PNP para makilala ang suspek kag mahibaluan kun ngaa ginpang patay ang mag utod.