Gin-disqualify na ukon indi na pagpahanugutan sang Land Transportation Office Region VI ang isa ka motorcycle rider nga makakuha sang driver’s license matapos makuhaan sang video nga naga “Superman” nga stunt sa banwa sang Don Salvador Benedicto.
July 13 sang nakuhaan sang video ang rider nga naga hapa sa pulungkuan sang motor samtang naga dalagan sa Orange Cliff sa DSB.
Matapos ang ginpatigayon nga imbestigasyon gin aprubahan ni LTO-6 Regional Director Gaudioso Geduspan II ang resolution sang Intelligence and Investigation Unit nga naga rekomenda sang immediate disqualification nga makakuha sang driver’s license ang amo nga rider.
Delikado ang ginhimo sang rider indi lang para sa iya kaugalingon kundi pati sa mga nasugata niya base sa nasaad sa resolution.
Bisan ginrason pa sang driver nga for video purposes lang ang natabo, wala pa siya sang lisensya gani bayolasyon ini sang Section 48 sang Republic Act No. 4136, ukon ang Land Transportation and Traffic Code. Ini ang makabig nga reckless driving.
Gani gin lakip sa alarm list ang iya nga ngalan kag indi na siya pwede maka kuha sang lisensya.
Kinahanglan niya magpaidalom sa Driver’s Reorientation Seminar.