Apat ka mga barangay sa Binalbagan ang na-apektuhan sang molasses spill gikan sa isa ka sentral. Ginsiling naman sang alkalde nga contained na ang molasses spill sa karon.
Ginsiling ni Forester Lucia Salazar ang Supervising Environment Specialist sang CENRO Kabankalan nga sila ang nagpadulong sa lugar sang Lunes upod ang tiglawas sang iban nga ahensya lakip na ang sa LGU Binalbagan para mag investigate sa natabo.
Nag patuman na sila sang water sampling kag napadala na ini sa Iloilo kag sa karon gina hulat ang resulta. Gin-ako sang Binalbagan Isabela Sugar Company ukon BISCOM nga ang ila pond type nga stockpile para sa molasses ang nag-moist suno kay Salazar.
Sang Abril 19, dala man sang mataas nga heat index suno kay Salazar nag explode ang ila nga pondtype stockpile para sa molasses.
Sa BISCOM report may 4,980 ka tonelada sang molasses ini pero natungod sa natabo 2,400 tons na lang ang nabilin suno kay Salazar.
Masobra sa 60 percent ang spillage. May mga sandbags naman nga ginpamutang ang BISCOM.
Nag patuman man sang pag kolekta sang molasses spill nga nag apekto sa Barangay Canmoros, Progreso, Marina kag San Juan. Dugang pa niya may gin-report nga fishkill sa coastline sang Canmoros.
“Kay ang aton nga molasses although nga waste of agricultural products but same no kun sobra naman siya, sobra ang iya nga volume maka daot, maka halit sa aton palibot. And allegedly, based sa report ni Sir Zamora there were fish kills na natabo sa Canmoros ang indicator gahapon namon nga nag prove nga may fish kill ang aton nga mga pispis, sangya sila nga damo sila mga food”, suno kay Salazar.
Suno kay Mayor Alejandro Mirasol ang LGU upod sa BISCOM Management ang nagapadayon sa clean-up and recovery efforts para mabuligan ang mga apektado nga lugar.
Wala man direkta nga naapektuhan ang palangabuhian sang mga mangingisda suno kay Mirasol bangud sa baybayon man ang mga mangingisda naga panagat. Nagakaigo naman nga sabton sang BISCOM ang natabo kag depende na ini sa Environment Management Bureau suno sa alkalde.
“Contained na na siya. Since kahapon na contain na gid man. Amo na gina tipon subong. Daw oil spill man. (damo ang fish kill mayor?) indi man ara lang sa suba”, suno kay Mirasol.