Patay ang isa ka bolantero sang baboy samtang pilason naman ang iya asawa matapos nga gintiro sila sang wala pa makilal-an nga gunman sa stockyard sang Purok Caimito, Barangay Bunga sa banwa sang Don Salvador Benedicto, kaina sang kaagahon.
Ginsiling ni Captain Ignacio Javier, deputy chief sang DSB Police Station, nagabaligya sang baboy ang mag-asawa bangud tiyenda sa lugar, sang sila ang ginpalapitan sang gunman kag gintiro.
Ginbawian sang kabuhi ang 57-anyos nga bana nga may igo sa ulo, samtang gindala sa ospital ang iya 48-anyos nga asawa.
Narekober sa lugar ang duha ka fired cartridge sang caliber .45 nga pusil.
Suno kay Javier, nakita sang mga saksi nga nagdalagan sa likod nga bahin sang stockyard ang suspek.
Sa panaysayon sang mga tawo sa lugar, maayo nga mga persona ang mag-asawa, gani padayon pa ang imbestigasyon sa kung ano ang motibo sa pagtiro sa ila.
Masami nga nagabaligya sang livestock ang bana, kag kun kaisa, nagabaligya man siya sang isda kag nagapanguma.
