May pila ka insidente ang na-record sa siudad sang Bais sa Negros Oriental kun sa diin nakabaton sang peke nga isa ka libo ka pesos ang mga magagmay nga negosyante kag local vendors.
Gani, nagpaandam ang Bais PNP sa tanan nga mga nagabaligya sa merkado, tag-iya sang tiyangge kag yadtong may mga small businesses nga magpabilin nga mabinantayon kag i-check sang maayo ang nagakabaton nga kwarta.
Suno sa Bais City PNP, ang modus operandi sang nagapalapta sang peke nga kwarta amo ang pagbakal sang magagmay nga kantidad sang produkto kag pagbayad sang bilog nga isa ka libo ka pesos, samtang ginapadali ang manugbaligya, agUd indi na maayo ma-check ang kwarta.
Ang matuod nga one-thousand-peso bill ang may yara sang hologram nga marka, color-shifting ink nga logo sang Bangko Sentral ng Pilipinas, naka-intaglio print, may UV feature kag asymmetric ang size sang serial number ukon halin sa gamay padako.
Kun hikapon ang matuod nga isa ka libo, naka-emboss ukon naga ulbo ang main portrait, pirma kag ang tinaga nga “REPUBLIKA NG PILIPINAS”.
[sibwp_form id=1]