Yara na sa maayo nga kahimtangan ang anum ka mga tripulante matapos sila ang gin-rescue sang mga Cadiznon nga mangingisda sa baybayon sa tunga sang mga isla sang Romblon kag Sibuyan, Lunes nga adlaw, Hunyo 30.
Nagasakay sa M/V San Juan Baustista, isa ka landing craft transport ang mga tripulante sang sila ang naglugdang bangud sang buho sa ballast tank sang sakayan.
Natabuan man nga may naglabay nga mga mangingisda padulong sa Negros Occidental. Ginbuligan nila ang mga tripulante kag gindala sa Cadiz Commercial Port.
Gikan sa Guihulngan Port, Negros Oriental ang sakayan kag magapadulong kuntani sa Navotas City para sa dry docking.
Suno kay Philippine Coast Guard Southern Tagalog District Commodore Geronimo Tuvilla, may karga nga 2,500 liters sang krudo ang sakayan kag wala sang kargo.
Gindala ang mga ginrescue sa PCG Substation sa Barangay Zone 6, Cadiz para makapahuway antis sila ang makapauli sa ila tagsa ka mga lugar sini nga hapon.