Shadow

Mga transport group sa Negros Occidental indi mag renew sang ila franchise kun indi pagdulaon ang jeepney modernization program

Dismasyado ang katapo sang transport group nga nagtambong sa turn over ceremony sang siudad kag Land Transportation Franchising and Regulatory Board para sa Local Public Transportation Route Plan nga nagatukod sang 24 ka mga panibag-o nga rota para sa masobra isa ka libo nga dugang nga mga units.

Milestone ang pagkabig sang LTRFB sa lihok sang Bacolod.

Pero para sa katapo sang United Negros Drivers And Operators Center ukon UNDOC isa ini ka patalang bangud upod sa City Ordinance 966 nga naga-adopt sang LPTRP ang pagduso sang public utility vehicle modernization program nga magaresulta sa pagphase out sang mga depasahe nga salakyan nga masobra na sa kinse ka tuig nga naga-byahe.

Suno kay Diego Malacad, secretary general sang UNDOC, may kasugtanan na sila upod sa Federation of Bacolod Drivers Association kag Sentrong Samahan ng mga Tsuper at Operators sa Negros ukon SSTONE nga kun indi ma-recall sang siudad ang ordinansa mapilitan sila nga indi na mag-renew sang prankisa.

Wala pa mapat-ud kun san-o sarang ipatuman ang mga pagsulundan sa idalom sang City Ordinance 966.

Pero nagapati ang katapo sang transport group nga paglapas ini sa Bayanihan to Heal as One Act 2 nga nagasaad angut sa pagpaiway sang phase out sa national kag local level karon nga pandemic.

Ang Bacolod ang ikaduha nga lgu nga may nahuman na nga route plan para sa ginaduso nga modernization program sang LTFRB kag Department of Transportation.

Gani ginadayaw man ni LTFRB chairman Martin Delgra III ang siudad sa nahuman nga route plan sa tuyo nga masolbar ang nagalala nga problema sa local public transporation system sang pungsod.

Leave a Reply

Your email address will not be published. Required fields are marked *

Secured By miniOrangeSecured By miniOrange